豬年談豬（刊載於2019年2月20日《東周刊》）
豬年伊始，開筆大吉，祝願香港政通人和，市民安居樂業！
每年大年初二，鄉議局及沙田鄉事委員會到沙田車公廟求簽。今年鄉議局主席劉業強議員為香港求得八十六號中籤，曰：「石田為業喜非常，畫餅將來未見香；怎曉田耕耘不得，那知餅食不充腸。」業強主席即場解簽，指出香港底子好、有優勢，但政府規劃和施政需市民支持，才有更好明天。傳媒朋友叫我回應兩句，我話今年外圍政治經濟形勢不利，求得中簽好合理噃。
有網民眼利，話將四句簽文最尾一字合起嚟，乃「常得香腸」，寓意大家都有口福，好簽也！講起香腸，亦與豬分唔開，無論德國香腸、意大利莎樂美腸、中式臘腸 ..... 等等，都離唔開豬肉。香港人過年，豬肉亦係主打食材。過年前同漁護署長梁肇輝博士傾起，知道香港現時有四十三個豬場，其中十多個有養黑毛豬，多數係混養其他豬種嘅，有幾間就專門養黑毛豬。我就好鍾意本地黑毛豬，早前喺社交媒體介紹如何用脢頭豬肉嚟整「肥燶瘦叉燒」，仲話如果再加「燶邊流心太陽蛋」、白飯、靚豉油，就係包保小朋友「食到舐舐脷」嘅「黯然銷魂飯 」啦！我仲分享過點樣自製日式「本地黑毛豚丼」。過年前老婆趁北風起，買本地黑毛豬腩喺屋企「晒臘肉」，我將啲相放上網，估唔到好多朋友回應。香港成功引進培育咁好嘅黑毛豬，抵讚！
謹祝讀者諸君，豬年「家肥屋潤，萬事如意，飲和食德，身體健康」！
