高鐵旅遊快靚正(刊載於2019年2月27日《東周刊》)
豬年新春初一至初三，香港西九高鐵站共二十六萬七千人次出入境，平均每日有近八萬九千人次，高於預期。年初三數字更達十萬零四千人次，再創單日新高。有反對者不斷唱衰香港高鐵，咒其拍烏蠅，又挑戰一地兩檢，咁就真係咒詛變祝福啦！事實上西九總站一地兩檢運作暢順，乘客喺該處通過香港與內地嘅邊檢及海關後，就進入高鐵網絡嘅廣闊天地，非常方便。
我同一班老友喺十二月中就私人搞咗個「高鐵潮汕捐窿捐罅搵食團」，一行十幾人。早聞潮汕美食與文化精髓，可惜礙於交通時間太長，久未成行。知道高鐵西九直達潮汕站，不需三小時，老友們甚為雀躍，立即夾時間，研究路線，網上訂高鐵票、酒店，上網搵飲食及景點資料。至於旅遊中巴喺朋友用過覺得幾好而介紹嘅，可以用 WeChat 聯繫司機訂定接送。
我地喺星期六早上八時四十分從西九站出發，十一點半到達潮汕站，中巴已在等候，直踩牛肉火鍋店午飯，時間啱啱好。喺汕頭住兩晚，盡嚐潮汕打冷、鹵水鵝、海鮮、魚蛋、牛丸、潮式糖水粿品等等地道美食，亦遊覽咗「廣濟門城樓」、「廣濟橋」、「饒宗頤學術館」、「牌坊街」等潮州名勝。星期一豐富午餐後，下午五點三十五分從潮汕站乘高鐵，晚上八點半到達西九。三日兩夜行程緊湊豐富超值，全靠高鐵開通！
來回兩程嘅高鐵車上港人甚多，相信不同路線嘅高鐵遊，掀起熱潮矣！
