工程科技 代代傳承（刊載於2019年4月10日《東周刊》）
香港工程師學會（HKIE）本年度嘅周年晚宴，於上月中假灣仔會展中心舉行，今次係第四十四屆。一如往年，來自學會不同分部嘅會員與嘉賓們濟濟一堂，誠工程業界盛事！
呢張在晚宴上嘅留影特別有意思。後排十位年青人，乃參加今年學會「師傳計劃」（President's Protégé Scheme）嘅年輕工程師。
呢項計劃讓佢地有機會跟隨會長及資深工程師參與學會大型活動與內部會議，從中學習並吸收經驗。歷屆參加過計劃嘅年輕人又組成「師傳薈」，繼續在推廣工程行業及知識上出一分力。相片中會長與副會長及嘉賓喺前排，站在中央嘅係高錕教授夫人黃美芸女士，右邊乃發展局黃偉綸局長，左邊係中文大學校長段崇智教授。
「光纖之父」高錕教授係電機工程專家、中大前校長，○九獲諾貝爾物理學獎，以表揚其「在光傳輸於纖維的光學通信領域突破性成就」。高教授嘅研究成果，帶來通訊與資訊科技大突破，帶來人類工作與生活模式重大改善。呢張相片正正表達出工程科技代代傳承，不斷創新嘅意義！
