自家出品清湯腩（刊載於2019年6月12日《東周刊》）
「中國古代四大發明」，大家都知係我哋引以為傲嘅「造紙術、指南針、火藥、印刷術」。有朋友戲稱「中國民生四大發明」，係「粥、粉、麵、飯」。民以食為天呀，有道理！如果再講到香港地道粉麵小食，我就認為四大發明係「雲吞麵、牛腩麵、魚蛋粉、燒鵝瀨」啦！
講起牛腩麵，其實香港唔少家庭都識得炆牛腩。不過好唔好食，就要講下秘訣！炮製「清湯牛腩」，我家秘訣好簡單，就係用「牛骨熬湯」再煲牛腩，咁煲出嚟嘅牛腩更加好味，而牛腩湯有牛骨底，當然更甜、肉味更濃郁！另一要訣係牛腩本身：「坑腩」味濃，買到「挽手腩」更好，再加啲爽滑嘅「崩沙腩」，食味口感更豐富。
我細路仔時，麵舖多數供應「柱侯牛腩」，其實自家炆製亦唔難。本地醬園多數都有製備「柱侯醬」，亦有用以炆鵝鴨牛羊嘅「羊牛鴨醬」或其他名堂嘅炆肉醬。我家以呢兩種醬相配合，令傳統柱侯味添上南乳味芝麻味，更複雜香濃！至於淥生麵唔好貪快，逐少嚟，每次淥一兩個好啦，保證麵身爽滑。生麵淥好放在牛腩牛骨湯底中，澆上柱侯腩汁，放幾件牛腩，最緊要加些少韮黃。當然，用以製作柱侯牛腩撈麵亦可以。自家出品，食味更啱心水！
