無人船（刊載於2019年7月3日《東周刊》）
上星期我講到香港科技大學培育出無人機科技領軍人物「汪滔」，科大前校長陳繁昌教授同我講過，佢話科大喺無人機、無人船、無人車三個領域嘅研究都好出色。咁無人船科研成果能否產業化呢？邊位跑贏呢？答案就係科大工程博士生︱張雲飛，佢喺科大讀博士嘅時候已創立「雲洲科技」。
一○年成立嘅雲洲科技係中國第一家研發生產環保無人船嘅企業。經過九年拚搏，雲洲掌握嘅無人船艇核心技術已包括環保測繪、海洋調查、安防和軍用四個範疇。
雲洲自一二年推出世界上第一艘環保測繪無人船，到現在佔有國內市場超過九成，產品還出口到世界各地。
無人船可以在極為惡劣嘅水上環境工作，亦可代替人類到極端氣候或難以到達嘅地區作業。雲洲無人船嘅成功事迹，包括在天津港大爆炸、甘肅隴西尾礦嘅環境應急事故中搶險，參加青藏高原科技考察，隨「雪龍號」到南極考察等等。
去年八月我同香港科技界朋友到粵港澳大灣區考察，其中一站就係珠海雲洲智能科技總部。當日負責人表示，全世界有關無人船嘅技術專利，雲洲佔三成之多。負責人還介紹雲洲在珠海興建嘅全國首個無人船研發測試基地︱香山海洋科技港。可見雲洲團隊嘅自主創新能力極強，我當然要同佢地嘅無人船影張相啦！
