水資源與水環境（刊載於2019年11月6日《東周刊》）
《逃犯條例》修訂引發四個多月嘅社會動亂，重創經濟民生，多個原計劃在本港舉行嘅國際級大型活動被迫取消或延期。不過，本月初就有一個國際會議如期在灣仔會展中心舉行，就係由國際水協會、國際水協中國香港地區委員會及ASPIRE合辦嘅：「第八屆國際水協亞太地區會議及展覽」（IWA-ASPIRE 2019）。
是次會議主題係：「以智慧擴建穩健的水資源，以科技創造韌性的水環境」。呢個國際級嘅活動吸引咗來自世界各地嘅水務領袖、水務監管者及決策者。喺兩日半嘅會議上分享各地發展水資源嘅經驗，交流如何靈活地運用先進科技，以解決近年極端天氣帶來嘅種種挑戰。
整個會議及展覽活動有十大主題，包括「氣候變化」、「綠色科技」、「廢水處理技術」及「水、環境衞生和健康」。睇下呢啲主題，即使行外人都會感受到水資源與水環境其實涉及甚多範疇！
本港淡水資源不足，食水約有二成來自收集所得嘅雨水，其餘約八成需要依賴從廣東省輸入東江水。香港水資源最缺乏嘅時間係六三年，當時因為嚴重乾旱，被迫制水至「每四日供水一次，每次供水四小時」。港英政府隨即與廣東省當局達成共識，興建東江水供港系統，喺六三年底經國務院批准，由中央人民政府撥款興建，其後粵港雙方正式簽訂東江水供港協議，喺六五年開始供水。自從東江之水越山來之後，供水系統與走線經過多次改造提升。現行嘅東深供水系統在○三年完成並開始運行。
我小學時經歷過「四日供水四小時」嘅制水日子，對當年以東江水解決缺水問題，有特別深刻嘅印象囉！
