中九龍幹線（刊載於2019年12月18日《東周刊》）
上期我講香港近年交通基建重要項目之一的中環灣仔繞道，今期我講仍在建造中，對將來改善九龍區交通甚為重要嘅類似設施「中九龍幹線」。我對是項工程印象甚深，固然由於呢個議題喺工程界討論已久，亦因為喺○七年六月二十四日，我主持立法會工務小組加會四小時，通過咗四百二十四億元嘅相關工程建議，不過等到當年十月二十日，財委會才通過撥款。呢項幹道工程估計需時八年，從一七年底開工，到二五年完成。
中九龍幹線全長四點七公里，三線雙程分隔，其中有長三點九公里嘅隧道，係六號幹線嘅一部分，貫通九龍東西，由九龍灣、啟德、土瓜灣、何文田、至油麻地，西面連接油麻地交匯處，東連T2主幹道及興建中嘅將軍澳藍田隧道。
其實早於上世紀九十年代，香港政府已開始研究中九龍幹線嘅可行性，不過難度的確好高。中九龍人煙稠密，建築物與各種設施林立，所以走線設計極具挑戰，其中隧道走線更會相當接近幾條地鐵隧道。相關工程管理亦要非常慎密，以確保對沿線房屋、交通及各種公共設施與服務嘅影響或阻礙，能減至最低。對環境因素如有影響，亦要有相應嘅緩解措施。例如鑽挖方式，就要因地制宜，包括鑽挖爆破及傳統嘅鑽挖方法等。挖掘軟土嘅時候，亦要用大量臨時支架以應付不同嘅地質情況。
中九龍交通愈來愈繁忙，相關道路，包括培正道、佛光街、東九龍走廊、啟德隧道及渡船街等等，擠塞情況嚴重。中九龍幹線通車後，可以提供非常便捷嘅替代路線，行車時間可以由逾半小時縮減至約五分鐘，社會效益甚大！
