中環灣仔繞道（刊載於2019年12月11日《東周刊》）
最近幾期我都係講香港嘅工程基建，涉及水務渠務等，讀者反應幾好。我今期講另一類基建項目，就係道路設施，先講下通車已接近一年嘅「中環灣仔繞道」。
呢項繞道工程其實還包括東區走廊連接路，係位於香港島北岸嘅策略性幹道。早於上世紀九十年代，當時嘅港英政府已提出要建設繞道，從研究到一九年一月二十日通車，前後經過三十年，過程波折重重！
○三年有環保團體首次引用《保護海港條例》申請司法覆核，挑戰中環灣仔繞道工程嘅填海計劃。法院在當年七月裁決城規會敗訴，灣仔填海計劃第二期嘅工程批准被迫取消。直至○五年，終審法院因應繞道工程合乎公眾利益，裁定政府勝訴，容許喺維港範圍內嘅港島北岸填海。
繞道嘅走線中，有長三點七公里長，是相當高難度嘅隧道，要橫貫中環與灣仔填海範圍，並且穿過銅鑼灣避風塘海床以下。工程亦要進行嚴格嘅環境影響評估，包括空氣質素、噪音及水質等。工程走線充分遵從保護海港條例，完成之後，連臨時填海部分，都會還原回復海面嘅原貌。至於喺東區走廊設置嘅隔音屏障及半密閉式隔音罩，可以減低噪音，對改善周邊嘅居住環境，有所幫助。
中環灣仔繞道項目，到○九年得到立法會財委會通過撥款，年底正式開展建造工程，歷時九年多完成。 以往港島北日日塞車，產生大量廢氣損害健康，產生大量碳排放破壞環境。隧道有最先進嘅空氣淨化系統，可以除去八成可吸入懸浮粒子及二氧化氮，大大改善空氣質素。繞道通車之後，行車時間縮短至五分鐘，市民稱便！
