趨吉避凶 平安是福（刊載於2020年1月29日《東周刊》）
呢篇小品文章執筆之時，為臘月廿七，出街之時，則已經係鼠年新春啦。執筆之日立法會仍然有幾個事務委員會要開會，還好早上有些少空檔，於是驅車到大埔林村相熟農園，托先前揀定嘅桃花返屋企。今年花期冇乜風雨，新界桃花普遍都好靚。本地花農，一年辛勞，靠呢個時候收成，好值得我地支持！
除舊歲，迎新春，本來係喜慶日子，但今夕送豬迎鼠，卻有雙重隱憂：一方面未知超過半年社會動亂後，香港能否回復平靜；另一方面受武漢肺炎威脅，要積極防疫。經民聯喺一月上旬發表《改善全港社區環境衞生》研究報告，亦責成特區政府致力提升環境衞生工作嘅效率，並呼籲市民注重衞生，全城防疫，保持警覺。
經民聯呢份針對全港社區環境衞生狀況嘅研究報告，建議政府撥六十五億元設立「五大環衞專項基金」，涵蓋鼠患、蚊患、冷氣機滴水、公眾街市現代化、運用環衞科技等範疇，旨在為未來五至十年提供足夠嘅資源，確保環境衞生政策措施嘅持續性。
有傳媒朋友問我有乜嘢鼠年願望，我以「福」字祈盼：
香港趨吉避凶，轉禍為福！市民安居樂業，家庭幸福！社區祥和寧靜，平安是福！
作為工程界代表，我亦祝願業界持續發展，新年納福！祝本欄讀者諸君身心康泰，迎春接福！
