檢疫中心緊急工程（刊載於2020年3月11日《東周刊》）
新型冠狀病毒肆虐，疫情嚴峻，有一個唔易解決嘅問題就係隔離、檢疫嘅設施。所以政府除咗徵用一啲新落成嘅公屋單位做檢疫用途外，需要緊急落實幾個檢疫中心嘅建造工程，特別利用組裝合成建築法（MiC），務求最快速最靈活咁完成目標。
政府選咗四個地方建臨時檢疫設施，包括「鯉魚門公園度假村」、「八鄉少年警訊中心」、「西貢戶外康樂中心」及「竹篙灣」。我早兩日聯同負責嘅政府技術官員，先後走訪呢四個地盤，並向前線地盤員工派贈合共三千二百個由「人間有情慈善基金」提供嘅口罩，以感謝佢地喺疫情中日夜拚搏趕工，建造幫助市民抗疫嘅設施。
「中國建築」負責嘅「鯉魚門公園度假村」地盤分兩期，Site A喺不足一個月內從無到有，完成相關地盤開發與基建及一百一十八個單位，已喺二月二十八日交付使月。目前進行Site B工程，建造另外嘅二百三十四個單位。「八鄉少訊中心」內「協興工程」嘅地盤，正加建約一百二十個貨櫃式臨時單位，連同中心多層建築內改裝嘅八十八個單元，好快可提供共二百零八個檢疫用嘅單位。至於「西貢戶外康樂中心」工地，就由「保華建業」負責，目標係九十九個貨櫃式單位，疊成三層。
由「中國港灣」負責嘅「竹篙灣」地盤係四個之中最大嘅，面積約四公頃嘅政府用地及相連土地，需要開發平整。承建商要日以繼夜完成地基、供水、供電及通訊網絡等，及興建醫護人員設施、控制中心、警務與消防用地，加上一百個貨櫃式單位。除此之外，呢項工程提供大幅有完整基礎設施嘅土地，可以再起五百個單位或更多。
