橫洲公屋遲一年 四千住戶輸三億（刊載於2020年3月25日《東周刊》）
香港有人以「攬炒」為動員令，有人聽見「攬炒」就心驚肉跳！
建造業界係深受「攬炒」影響嘅受害者，失業數字對比其他行業更高。一月份香港平均失業率百分之三點四，而建造業數字就達到百分之五點七。喺新冠肺炎疫情影響下，雪上加霜。二月份建造業失業率就升至百分之六點八，而就業不足率達百分之六點二！
當前工程界正面臨「工作鏈、供應鏈、資金鏈」「三鏈斷裂」嘅危機，幾十萬建造業界工人及專業人士嘅生計大受影響，中小企危在旦夕。有啲人慣於將民生掛喺嘴邊，又話要為年輕人帶來美好嘅未來，但實質上口是心非！各種形式嘅「拉布」、「攬炒」、「泛政治化」唔停止嘅話，整個建造業都受害，民生相關項目被延誤，廣大市民最終都會被拖累！
工務工程被拉布拖累嘅一個例子，係十八億元嘅「元朗橫洲公屋發展第一期工地平整及基本設施」項目，涉及四千個公屋單位。工務小組早於一九年三月已經通過該項目，提交財委會，結果因為議會拉布，又由於七月一日立法會大樓被嚴重破壞，財委會無法加會，拖拖拉拉之下，到今年三月十三日，先至獲財委會通過撥款。呢一年嘅拖延，使到四千個公屋單位再遲一年興建。試想吓，四千戶輪候公屋嘅市民要多等一年，每戶現時嘅住所，即使係環境惡劣嘅劏房，假設比公屋租金每月要多支出七千元，一年每戶就多俾八萬四千元，咁四千戶共多支出幾多呢？係三億三千六百萬元呀！呢三億幾，係基層市民實際從微薄收入中攞出嚟㗎！「拉布」、「攬炒」、「泛政治化」嘅為害，唔需要我多講啦！
