第二輪防疫抗疫基金（刊載於2020年4月15日《東周刊》）
行政長官宣布推出第二輪防疫抗疫基金，動用一千三百七十五億元，都算大手筆。兩輪抗疫基金加上財政預算案公布嘅支援措施，總開支達二千八百
七十五億元，喺本港歷史上真係破天荒！
不過究竟第二輪抗疫紓困措施幾時可以出台，要睇立法會財委會幾時通過撥款。政府已提出要打尖喺四月十七日上財委會，我希望能夠順利通過。今次嘅措施，係好多企業與市民嘅救命草！至於財政預算案，估計喺反對派慣性拉布之下，要到五月下旬先至可以通過。
面對嚴峻嘅疫情，香港特區政府作出史無前例嘅「撐企業，保就業」行動，減輕企業與市民嘅財政負擔。其中八百億元嘅「保就業」計劃，相當大力度。政府提供五成工資補貼，為期六個月，實質資助每名僱員最高每月九千元，而條件係僱主承諾唔會裁員。
我支持政府及時「還富於民」，同時亦促請政府更大力照顧青年人就業。最近同啲大學教授傾起，佢哋往年都有為學生介紹工作嘅，但係都擔心今年畢業生搵工難。我特別關注工程界新畢業同學及年輕工程師嘅生計，因為經濟下行，企業可能減少聘請新人入職，咁對於想走上專業道路嘅年輕人就好大打擊。今次政府另一項保就業嘅措施，係承諾未來兩年在公私營界別，創造三萬個總值六十億元嘅有時限職位。而政府作為最大僱主，會繼續聘請約一萬個公務員職位，及大約五千名青年實習生。另外政府亦為所有學生貸款還款人自動提供免息延長還款期，為期兩年。對呢幾項措施，我深表支持，亦呼籲政府與業界力保呢啲生力軍嘅就業，提供適當嘅入職培訓機會，繼續為業界培養接班人。
