開倉救命（刊載於2020年4月22日《東周刊》）
本文執筆之時，立法會財委會經過兩日會議，剛剛通過咗一千三百七十五億元嘅第二輪防疫抗疫基金撥款。第一日會議從早上九時開到晚上十一時，第二日從上午九時開始直踩，期間反對派動議中止待續，全部被否決，否則唔知拖到幾時！
疫情嚴峻，香港好多行業受重創，打工仔面臨失業威脅，急待政府「撐企業，保就業」！雖然抗疫紓困措施仍有改善空間，例如八百一十億元嘅保就業計劃，就忽視咗六十五歲以上在職而不需供強職金嘅人士，但如果因為未夠理想就推倒撥款，好多企業與員工都會斷水！反對派堅持阻撓與反對呢千三億撥款，令人慨嘆！
今次措施之一，係將中小企融資擔保計劃下「百分百擔保特惠貸款」嘅總信貸保證承擔額，增至五百億元，每間企業最高可借四百萬元，而首十二個月可以還息不還本，對銀根短缺嘅企業，有實質幫助！
我發言時指出，既要「治理急症」，更要「固本培元」。派錢雖係救命草，但係如果冇工開，就多多錢都唔夠派。所以喺支持通過千三億元基金，救民於水火嘅同時，我呼籲政府推出多啲新嘅工務工程，並鼓勵半官方與私人機構推動多啲工程項目。我更指出必須為今年畢業同學，提供入職機會，除咗政府直接聘請，如何資助企業提供新職位亦非常重要。在席官員對呢個問題嘅回應都算積極，我會繼續跟進，例如見習工程師嘅資助計劃，就係其中重點之一。
「財政預算案」公布咗千二億元嘅紓困措施，不過仍有待立法會大會通過。面對內外交困嘅形勢，必須「還富於民，開倉救命」！
