港鐵減價 (刊載於2020年4月29日《東周刊》)
第二輪防疫抗疫基金對市民出行方面都有紓困措施，主打動作當然就係港鐵減價兩成！呢次減價係為期六個月嘅支援措施，港鐵由今年七月一日至明年一月一日，推出「程程百分之二十車費扣減」優惠，而購買「都會票」及五款「全月通加強版」嘅乘客，則有一百元折扣。減價估計合共涉及車費優惠約十六億元，政府會承擔其中嘅一半，以八億元金額為上限，其餘少收嘅車費就由港鐵公司自行承擔。
另一方面，政府亦會由今年七月開始，將「公共交通補貼」門檻，由四百元下調至二百元，可以稍減市民日常交通開支。不過，政府在一月中已經宣布嘅：長者兩元乘車優惠從六十五歲放寬至六十歲，就未有落實時間，要再追數。
其實早在三月初，我與經民聯幾位議員，已多次約見運房局局長陳帆等高官，以及港鐵公司管理高層。我地指出新型冠狀病毒肺炎疫情持續，多個行業受到衝擊，基層市民生活大受影響，所以建議港鐵減價三成，從四月開始至十二月底。我地表示政府作為港鐵最大股東，從往年股息中攞部分嚟減低票價，幫助市民抗疫紓困，係應有之義。而港鐵以往盈利理想，在嚴峻疫情之下，以減價表示與市民同行，共渡時艱，更可以突顯港鐵係「香港人嘅港鐵」。
我地繼續積極向特首、政務司司長、財爺解釋，指出政府與港鐵喺嚴峻嘅疫情中，如果能夠以減價紓減市民出行負擔，會有非常正面嘅社會作用，既幫到市民，又係非常好嘅公關。如此這般，政府與港鐵高層嘅態度變得積極，最終落實減價兩成，值得支持！搭長程港鐵嘅市民，一日就可以慳番幾元，夠買個菠蘿包啦！
