創職位 保就業（刊載於2020年5月13日《東周刊》）
喺財委會審議一千三百七十五億元「第二輪防疫抗疫基金」嘅會議上，八百一十億元嘅「保就業」計劃自然係最多人問嘅。我亦有就政府如何創造職位，保青年人就業，追問政務司司長張建宗。司長話當前風高浪急，就業困難，佢亦明白要面對畢業生求職旺季開始嘅壓力。司長表示政府今年準備招聘一萬名公務員，另外有五千實習名額，其中有唔少係適合新畢業同學嘅。另外政府亦計劃喺兩年內，公私營合作，創造三萬個臨時工作，共值六十億元。
關於如何具體推出多啲職位，發展局黃偉綸局長表示發展局及轄下部門，包括機電工程署、屋宇署、土木工程拓展署等，會積極配合與落實行政長官「保就業」、「創職位」、「提升工作效能」嘅新措施，喺未來一段時間，創造大約四千七百個短期職位。呢啲職位涵蓋不同嘅範疇、不同嘅技能、不同嘅學歷。例如聘請顧問公司為政府樓宇工程採用「裝配式設計」制定指引、優化政府設施嘅機電裝置系統、檢查大廈外牆嘅排水管、加快推行「長遠防治山泥傾瀉計劃」、加快更換及維修渠務系統等等。局長亦強調為應屆畢業生提供職位，包括工程、測量、規劃等專業嘅「畢業生實習計劃」。
黃局長解釋話呢啲新創職位，包括超過五百三十個政府職位，及四千一百多個私人機構職位，部分最快可在三個月內逐步落實。
本港經濟喺多重夾擊之下受重創，最新失業率上升至近十年高位，達百分之四點二，而首季本地生產總值按年跌百分之八點九！就業形勢比較○三年「沙士」嘅時候更嚴峻，因此政府必須及早推出新創職位，盡力保障市民就業。
