主席：

     基層醫療係病人響醫療系統第一個接觸點，做得好，服務足夠，能夠令病人最快得到幫助。但如果基層醫療做得唔好，就會變相將病人帶到去醫院。舉個例子，提供夜診服務嘅診所唔夠，或者打爛電話都預約唔到政府普通科門診，會令到市民有親病痛，都只有去公立醫院急症室。唔怪得近期流感高峰期，有市民投訴話去睇急症要輪候15個鐘頭。呢種情況除咗令市民有病等到躁，令醫護人員做到死，亦浪費咗寶貴嘅醫療資源。

         醫院係負責第二同第三層醫療，但唔少市民都用黎睇傷風感冒，係唔理想嘅。要改變呢種情況，一方面要增加公營嘅基層醫療服務，例如要增加醫管局嘅普通科門診診所，同埋延長服務時間，以及改善預約系統。另一方面，私家診所亦都係非常重要，呢D診所規模可能唔大，但勝在遍地開花，好多屋邨商場都有，唔少市民有病都首先去睇佢地，基層醫療發展都係要依賴呢種公私營合作嘅模式。

        主席，醫療設施同服務系統固然要提升，但人手就係最重要嘅問題。以醫生嚟講，香港只有約13,000名醫生，人口比例係1:552，減去大約5,300個有專科資格嘅醫生，香港最多都係得約8,000個普通科醫生，要應付780萬市民嘅基層醫療需要，好明顯唔足夠。所以市民去睇病，即使係私家診所，一樣閒閒地要等個幾鐘。

        隨著人口老化，醫生不足嘅情況只會愈嚟愈嚴重。一方面我地要加強培訓，但如果真係唔夠醫生用，我地響人口政策方面會唔會放寬一下呢？而家外地嘅醫生想黎香港行醫，要重新考過俗稱「大清算」嘅執業試，將5年讀醫嘅課程內容一次考哂，係的確有些強人所難。為咗保障病人安全，確保質素，考試係有需要，但一個合格率只有一兩成嘅考試，係唔係真係合理呢？相信響美國、英國讀醫嘅醫科生水平不會低成咁。醫委會其實可以考慮下分開多幾次考，或者將考試內容改得更加貼近臨床需要，俾醫術了得嘅外地醫生得到係香港執業嘅機會。

        主席，香港唔少中產家庭，佢地都想自己負責返自己嘅醫療責任，所以有買醫療保險，一旦有事都可以去睇私家醫生。政府一直想公私營合作，有買醫療保險嘅病人更願意搵私家醫生，減輕公營醫療負擔，所以政府好應該鼓勵佢地，提供醫療保險稅務優惠。

        此外，隨著醫療器材家用化，而家血壓計、血糖機等儀器價錢唔貴，又易於操作，可以幫助市民簡單咁了解自己嘅身體狀況。政府可以諗下點樣透過地區組織，例如業主立案法團、區議員辦事處等，鼓勵佢地買一兩部咁樣嘅儀器俾市民用。我地嘅區議員都會幫手介紹健康資訊，安排居民打流感針，或者幫手量下血壓，都係可以分擔到市民基層醫療嘅需要。

        主席，最後我想講，有D毫無根據嘅批評話工商界淨係講經濟，唔理民生，唔識市民生活困苦。我自己作為工商專業人士聽到真係覺得可笑。就以醫療嚟講，工商界多年嚟一直促請政府提供醫療保險稅務優惠，要求增加《藥物名冊》資源同增加藥物，又建議政府增加醫療券資助額，簡化醫療券程序，同埋請政府考慮加強牙齒保健服務，仲有好多其他直接惠及市民嘅建議，係可以幫到市民嘅。

        主席，好多嘢唔係單靠政府做得哂，香港嘅工商界有份出錢，有出力，亦有朋友用佢地嘅管理經驗，幫政府嘅相關計劃提升效率，又有用我地嘅人脈關係連繫唔同嘅服務提供者，對社會民生有實際的貢獻。

        主席，本人謹此陳辭。