識得小弟耐嘅朋友，都知我自細對音樂好有興趣，從口琴開始，笛子、洞簫、秦琴、阮、喉管、嗩吶.......等等，都係自己摸索。亦有啲係拜師學藝，包括中五畢業後學咗三個月琵琶，亦跟朋友學過色士風。至於粵曲，係跟王粵生老師，南音及古琴跟唐健垣博士，聲樂跟史君良老師學習。小弟技巧一般，屬於周身刀，無張利，不過吹拉彈唱都識少少，以樂會友，娛己娛人，誠樂事也！

        機緣巧合下，有幸參與不同之業餘音樂組合，有流行音樂、中樂、粵曲、南音嘅。近年與工程業界及港鐵公司幾位工程師，組成中樂小組「港鐵 x 香港工程師」，一年有幾次公開演出機會，包括在香港站中環行人隧道嘅「港鐵藝術舞臺」，為乘客演奏。日前趁豬年新正頭，樂隊再度在上址出現，為乘客演奏節日樂曲，送上新春祝願與溫情暖意，亦表現出工程師們文化藝術嘅一面，饒有意義！演奏二胡者為港鐵車務總監劉天成，乘客見港鐵高層人士以樂手身份亮相，更感親切！

        今次壓軸樂曲係電視劇「荷理㓉有個大老千」之主題曲，原本乃中國流行曲之父黎錦光於1938年在上海作嘅流行曲「滿場飛」，我特意用「鑽石色士風」夾中樂奏出，懷舊得嚟夠晒 fusion！