立法會二十二位議員為期四日嘅長三角職務訪問，四月廿四日係最後一日活動。早上去到杭州阿里巴巴總部展覽館，聽集團主管人員介紹公司十八名創業夥伴，在馬雲領軍下，如何於一九九九年創立公司，訂定目標，推動電子商貿，以「讓天下沒有難做的生意」為宗旨。展覽分新零售、新農村、惠普科技、惠普金融、智慧物流 ...... 等範疇；介紹淘寶網、天貓、阿里雲、支付寶 ...... 等平台，非常精彩。

       二十年打拼，馬雲帶領團隊，建立咗「客戶第一、員工第二、股東第三」嘅企業文化；實現咗當年夢想，改變人們嘅生活、工作、營商、銷售方式，建立咗新商業文化；集團亦發展至十萬名員工，明年嘅商品交易總額將達一萬億美元！

       交流環節，阿里巴巴高層與杭州市公安交通代表介紹阿里雲與市政府共同建立嘅「城市大腦」人工智能平台，通過大數據分析，大大提升交通管理能力，改善咗城市交通擠塞情況。馬雲特意抽出寶貴時間，和考察團暢談，分享佢對大數據及創新科技嘅精闢見地。

       佢語重心長咁話：香港有非常豐富嘅數據、人才、資源，不能浪費；港人要抓住大數據，建立香港嘅「城市大腦」！

        聽君一夕話，當然更要與君打下咭啦！開完會，個個團友都要同馬雲影相，佢亦都好樂意，大家開心！