五月廿六日上午，沙田城門河舉行 「沙田龍舟競賽點睛儀式」。一如往年，我以「唱龍舟」嘅方式喺典禮上半唱半誦咁恭讀祝文。今年我先講端午節典故，然後就「逃犯條例修訂」與「粵港澳大灣區建設」，加料說唱，並祝願社會和衷共濟，歡樂和祥！祝文內容如下：

    「龍舟槳發，鼓樂鏗鏘，己亥蒲節，共賀端陽。

    「戰國屈原，憂民情愴，楚王棄用，鬱志投江，汨羅叫喚，三閭魂饗，裹蒸粽子，祭奠龍王。

    「千古流傳，時人敬仰，龍舟競渡，跨越時光，習俗相傳，古今一樣，慎終追遠，綿遠流長。

    「沙田體育會，乃係同仁共創龍舟建造，鳳艇鱗光，吉日點睛，龍舟亮相，百槳齊發，鬥志昂揚。

   「今日城河兩岸，蟬聲再唱，逃犯引渡，大費周章，公義彰顯，民心共向，如何修例，有商有量。

   「大灣區廣闊天地，人才薈萃，粵港澳攜手合作，創意高張，宜業宜居，旅遊旺暢，民生經濟，科技弘揚。

   「今日祝辭恭讀，同聲和唱，齊心互勉，建設香江，百業興隆，荷包腫脹，社會和衷共濟，歡樂和祥。祝各位身心康泰，聽過龍舟就如意吉祥。」

    想聽下呢段錄影，我嘅面書專頁有㗎！