七月中旬職業訓練局（VTC）嘅「工程專業顧問委員會」開會，特別安排成員到位於薄扶林嘅「中華廚藝學院」（CCI）午宴。學院為有志投身飲食業嘅人士及在職廚師提供中廚及餐飲管理訓練，畢業同學好多位已成為著名酒店與食肆嘅主廚。中華廚藝學院從星期一到星期五均提供午餐服務，星期五還有晚宴；有同學早前請我評分，我就讚佢哋服務態度甚佳，鼓勵佢哋繼續努力！

       餐後一眾成員到旁邊嘅新型建築物，去年十月落成嘅「國際廚藝學院」（ICI）大樓參觀。建築外型以最重要嘅調味料「鹽結晶體」來構思，採用傾斜外牆設計，與毗鄰嘅伯大尼修院等歷史建築物互相呼應，非常吸引。大樓內部設計同樣新穎而實用，各種菜系都有專科嘅教學廚房與設備，參觀者都話大開眼界。學院提供嘅廚藝課程涵蓋歐洲、日本、韓國、印度和地中海等菜系，讓學員吸收食品加工、食材、烹飪技術、食物科學與營養等專業知識。課程非常多元化，例如有葡萄酒及飲品商業管理、國際主題樂園及項目管理、西式包餅及糖藝等等。職訓局自一四年起已提供國際廚藝課程，增添呢座專科大樓之後，無論教學嘅質與量都大大提升。

       中華廚藝及國際廚藝兩所學院，為應學員嘅不同需要，設有全日制及兼讀制課程，並有各種短期課程，幫助有興趣廚藝嘅人士持續進修。

       我哋呢個委員會嘅成員都係來自與工程相關嘅專業，但亦有不少業餘廚藝愛好者，而且非常支持香港嘅專業教育多元發展，讓青年人有更多選擇及提升機會，亦可以持續終身學習。職訓局嘅努力，值得讚賞！