「香港品質保證局」（HKQAA）董事會嘅代表，喺七月中往陜西省西安市公幹，主要任務係視察局方在西安成立嘅辦事處，並出席喺西安市滻灞生態區舉行嘅「綠色金融絲路論壇二○一九」。論壇主旨係「構建陜港金融橋樑，共建綠色絲綢之路」，主辦單位包括陜西省地方金融監督管理局等。

       我以香港品質保證局主席身份在論壇致開幕辭，指出我局作為香港政府喺三十年前成立嘅認證機構，去年推出咗香港首個「綠色金融認證計劃」，目前獲認證嘅綠色債券及貸款發行總額已超過七十億美元，當中包括香港特區政府發行嘅首筆綠色債券。我哋並積極建立區域交流平台，大力推廣綠色融資，繼今年三月喺香港舉行「大灣區綠色金融論壇」後，今次到西安舉行絲路論壇，雲集陝港兩地精英交流討論，促進跨地域嘅綠色金融合作。

       香港品質保證局與多個大灣區政府金融機構建立咗策略夥伴關係，去年亦與陝西省地方金融監督管理局簽署合作備忘錄。而我哋喺西安嘅新辦公室，亦剛剛投入服務。在論壇上，局方還與西安滻灞生態區管理委員會、世界銀行集團國際金融公司，三方簽定諒解備忘錄，推進綠色建築、生態旅遊及綠色金融領域嘅工作，支持滻灞地區嘅綠色經濟創新發展，為生態環境作出更大貢獻。

       西安係十三朝古都，亦係古絲綢之路嘅起點。自從「一帶一路」倡議提出之後，西安更成為絲路經濟發展合作嘅核心地區之一。論壇後抽空到舊城區睇吓，「鐘樓」「鼓樓」燈光燦爛，互相輝映。大家都讚：靚！