七月份有一項由「環境局」及「機電工程署」合辦嘅活動，好值得幫手宣傳吓，就係「慳神創科大比拼二○一八」頒獎禮，暨「慳神重新較驗大比拼二○一九」啟動禮。活動旨在鼓勵不同領域嘅機構，率先計劃並採用創新嘅節能及可再生能源技術。作為評委會主席，我非常高興今次機構組及學生組分別收到超過一百四十及七百個參賽項目。得獎者推動業界節約能源，包括在研討會分享典範經驗，向大眾推廣不同嘅節能方法。

       至於新嘅「慳神重新較驗大比拼二○一九」，旨在鼓勵機構為現有建築物定期檢查效能表現，並通過創新科技作追蹤，制定以科學為本嘅優化方案。除機構組別外，亦設有學生組別，鼓勵年輕人在節能及可再生能源方面發揮創意。

       我相信大部分香港市民都同意，氣候變化如今已成為人類面對嘅重大挑戰。為咗應對氣候變化，要有效控制溫室氣體排放量。喺香港，溫室氣體排放嘅主要源頭係發電，大約佔總排放量三分之二，而接近百分之九十嘅電力都係用於建築物之內。換言之，建築物所耗用嘅能源，約佔香港溫室氣體總排放量嘅百分之六十。所以我哋必須多管齊下，一方面推廣使用更潔淨嘅能源及可再生能源，一方面要改善能源效益及推動綠色建築。

       慳神比賽舉辦咗幾年，每年都有不同嘅主題，目的都係提高社會各界對節約能源嘅意識，達致「全民慳神」，為香港締造一個健康、宜居及可持續發展嘅環境！