我在上月中參加由環境局局長黃錦星率領嘅「大灣區綠色循環經濟交流團」，與一眾貿發局、環保業界等代表前往佛山，和廣東省政府部門及組織就固體廢物管理及循環經濟等議題交流經驗。

       會議後，交流團到佛山市南海區，參觀專門處理固體廢物嘅「南海固廢環保產業園」。呢個綜合性嘅園區，環境優美，似公園多過似工廠，成功地示範如何以垃圾焚燒發電為能源核心，配置生活垃圾轉運、污泥處理及餐廚垃圾處理等，實現各處理環節資源共享、資源互換。連南海區嘅垃圾車，都係採用園區處理廚餘產生嘅生物柴油做燃料。而所有工序產生嘅臭氣都消化在燃燒設備內，所以園區全無垃圾臭味。

       目前園區有兩間生活垃圾焚燒發電廠，每間每日可處理一千五百噸，並正在興建第三間同樣處理量嘅垃圾發電廠。至於餐廚垃圾處理廠每日能處理三百噸廚餘。整體來說，可以處理四百萬人口所產生嘅生活垃圾，並提供六十萬居民所需嘅綠色電力。

       園區嘅母公司，係「瀚藍環境股份有限公司」，整個集團為內地十三個省共三十三個城市提供優質固廢處理服務，垃圾焚燒發電處理總規模達每日三萬三千一百噸！至於香港「綜合廢物管理設施第一期」嘅設計、建造及營運合約，已在一七年十一月批出，預計可於二四年全面運作。呢個項目喺石鼓洲填海形成約十六公頃嘅人工島，以建造一座最高處理量達每日三千噸嘅都市固體廢物焚化設施。

       香港業界需要與內地行家更多聯繫，因為環保產業要推廣成為「綠色循環經濟」，需更深入廣泛嘅跨區合作。