好多市民都知道香港特區立法會屬下有個工務小組委員會及人事編制小組委員會，但未必清楚兩個小組與財委會嘅關係。我就以工務小組主席嘅親身經驗解釋一下，成立工務小組與人事小組，係用以協助財委會審議政府提交嘅工務工程撥款申請，與政府人事安排（一般係涉及首長級職位）申請，並將審議結果提交財委會以考慮批准撥款。除該兩類與政府開支相關嘅項目外，其他類別嘅政府開支申請，包括教育、福利、醫療等等，都要財委會通過撥款。

       近幾年香港政治爭議激烈，以致小組通過嘅項目，甚多要在財委會再討論，形成項目積壓。一八至一九立法年度，工務小組通過審議提交財委會嘅項目共涉及一千四百億元，但其中財委會仍未批款嘅，超過七百億元。包括：一百六十億元嘅T2主幹路及茶果嶺隧道工程，一百八十億元嘅西九綜合地庫工程，七十七億元嘅將軍澳海水化淡廠第一期，二十四億元嘅橫洲公屋計劃工地基建，一百零九億元嘅葵涌醫院與威爾斯醫院等嘅重建或擴建工程，七十億元嘅沙田濾水廠重置工程等等。

       財委會本來準備喺七月份加會至七月二十日，有機會通過工務小組已完成審議並提交財委會嘅項目，及其他撥款申請。但由於七月一日衝擊立法會事件中，大樓設施被嚴重破壞，不能舉行會議，因而原計劃加開嘅財委會會議亦只有取消，以致逾七百億元嘅工程項目仍未獲撥款。政府工務工程，平均每年涉及千多億元，關乎工程建造業生計。近年受政治爭拗影響，工程批撥時高時低，令業界從業員一時做死，一時餓死，極不正常。