講起香港嘅渠務工程，市民可能唔覺佢嘅存在，但其實要抵禦洪水暴雨，防止水浸，真係無佢唔得，佢就係「蓄洪池」！

        香港雨水充足，間中有豪雨、暴雨。面對香港地勢高低不平，要採取相應防洪策略，包括「防洪三招」，即係上游截流、中游蓄洪、下游疏浚。

       蓄洪池嘅原理聽落好簡單，即係將部分來自上游嘅地面溢流貯存，以限制水流唔超過下游排水系統嘅容量，咁就唔怕水浸。暴雨嘅時候，入水口暗渠引入嘅雨水就會流入蓄洪池；雨水減退嘅時候，就將蓄洪池內嘅雨水抽進排水系統，再流出大海。

       不過香港人口與建築物密集，要起蓄洪池唔容易。第一個成功嘅大型蓄洪池，就係大坑東嗰個。呢個設施主要為防止大量雨水從獅子山向南湧下，而影響旺角一帶。市民可能記得大約廿年前旺角區嚴重水浸嘅教訓，其後渠務處決定喺大坑東球場地底建造香港第一個大型蓄洪池，容量相等於四十個標準泳池。工程喺○一年開展，○四年完成，可以抵禦五十年一遇嘅暴雨，即每小時超過一百毫米嘅降雨量，咁黑色暴雨都唔怕啦！

       上環海味街水浸，商舖損失大量鮑魚海參等海味嘅情景，相信唔少市民都記得。為解決呢個問題，渠務署在○九年建成上環雨水泵房系統，容量大約等於四個標準泳池嘅地下蓄洪池，從此上環水浸嘅威脅大為減少。

        另一個大型蓄洪池，位於跑馬地馬場正下方，面積有五個足球場咁大，工程喺一七年完成。開幕典禮落到蓄洪池參觀，感覺就係一個巨型嘅地下宮殿，嘆為觀止！