本港建造業界有一項盛事在進行中，就係「2019建造創新博覽會」，CIExpo，簡稱「創博會」。三日嘅活動包括會議及展覽，由香港特區政府發展局及建造業議會合辦，並由中國住房和城鄉建設部嘅科技與產業化發展中心協辦。

       今次大會有四大主題，包括「裝配式建築」、「建造機械化」、「建造數碼化」、「先進技術及材料」。市民未必清楚「裝配式建築」嘅細節，但在馬路上時時見到大貨車裝住大大件嘅樓宇建築模塊，都會知道係起樓嘅預製件，而呢種就係「裝配式建築」嘅其中一類技術。至於「組裝合成建築法」（MiC），及「可供製造及裝配的設計」（DfMA），亦係業界致力推動嘅。特別係MiC可以大大提升興建臨時房屋嘅生產力、靈活性與速度。

       至於「建造數碼化」，大家自然會聯想到5G流動網絡、虛擬實境/擴增實境技術（VR/AR）、物聯網（IoT）等，因為呢啲都的確惠及各行各業。建造業界嘅數碼化，有一樣特別嘅就係「建築信息模擬」（BIM），簡單解釋就係涵蓋咗幾何學、空間關係、地理資訊系統、及各種建築元件嘅性質及數量嘅詳細資訊，用以展示及管理整個建築嘅生命周期，從設計、建造、使用、營運、維修，到最後拆卸回收等。BIM越來越廣泛應用喺各式各樣嘅建築上，因而減少參與方之間提供與接收資訊嘅時候，可能發生嘅資訊遺漏與溝通落差。

       進入二十一世紀，建造業更要以創新驅動。今次嘅創博會，可以為業界提供知識分享及配對嘅平台，推動建造新年代，值得支持！