本文執筆之時，正值二○二○年元旦，我身處日本關西和歌山。日本人係慶祝新曆新年，早上我喺溫泉酒店食日式早餐，店員未上食物，先送上一套大紅色嘅酒具（見圖），原來係要嚟飲「屠蘇酒」！日本傳統，新年飲屠蘇酒（お屠蘇、おとそ），討其吉祥意頭。呢壺酒味道好甜，冇乜酒精，好易入口。

       呢種風俗來自中國古代，不過我哋 家都冇乜聽過飲屠蘇酒，反而日本仍然保持傳統。

       中國古代喺新年飲屠蘇酒，原來係有根有據嘅。南北朝梁宗懍嘅《荊楚歲時記》有段咁講：「『正月一日』長幼悉正衣冠，以次拜賀，進椒柏酒，飲桃湯，進屠蘇酒……次第從小起。」宋朝蘇轍嘅《除日》詩有兩句：「年年最後飲屠蘇，不覺年來七十餘。」另外宋王安石亦有《元日》詩曰：「爆竹聲中一歲除，春風送暖入屠蘇。千門萬戶曈曈日，總把新桃換舊符。」屠蘇，指古代春節時飲嘅，用屠蘇草或幾種草藥泡嘅酒。正月初一，全家老小飲屠蘇酒，然後用紅布將渣滓包起，掛喺門框上，用以驅邪及躲避瘟疫。

       送上飲屠蘇酒嘅掌故，祝願香港早日回復寧靜太平！

       敬祝讀者們新年進步，身體健康，事事如意，出入平安！