早兩期我喺呢個專欄寫香港嘅道路交通基建，今次話題轉到另一重要交通設施，就係「香港國際機場」。我地嘅機場有第三條跑道工程，但其實同時還有多項機場設施改善與擴建工程，如火如荼咁進行中。

       本文執筆之時，機場剛好有座龐然大物「天際走廊」順利「埋位」，好值得為讀者們介紹。呢條長二百米、總高接近四十五米、淨高近三十米嘅行人天橋，係用嚟連接機場「一號客運大樓禁區」至「北衛星客運廊」，即係供窄體飛機停放嘅登機閘五○一至五一○。現時順利埋位之後，要進行主橋與橋墩嘅連接工程，還有後續裝修，預計今年第二季落成。

       天際走廊嘅天橋組件，係在內地預製嘅，於去年第四季，分三大件由中山經海路運抵本港機場，然後在停機坪進行焊接與組裝，再搬移到最終位置。

       北衛星客運廊係一座四周有飛機滑行道圍繞嘅獨立建築物，亦不在旅客捷運系統嘅服務範圍，所以一直都要依靠禁區內嘅機場巴士往來。將來天際走廊啟用後，旅客在一號客運大樓過關往禁區之後，可以經由天際走廊嘅行人輸送帶，步行約十分鐘前往北衛星客運廊，非常方便；而且預料每日減少四百班接駁巴士，大大減輕停機坪嘅運作壓力。

       天際走廊橋上設觀景位及餐飲設施，天橋地板會有部分透明玻璃，旅客可以往下睇到飛機在滑行駛過，大至A380廣體機都通過到，將來必然成為熱門打咭位！