呢篇小品文章出街時，已經係農曆十二月底，而呢個月又稱「臘月」。「臘」喺中國古代歲末祭祀諸神及祖先嘅活動，因此稱農曆十二月為臘月。俗語話「臘鼓頻催，年關將至」，皆因舊時代商業往來，有欠賬者，到農曆年底就必須結清債務，因此以年關稱之。新時代商業活動唔多計農曆，不過現時本港經濟喺內外交困之下，情況不理想，希望特區政府一連串嘅紓困措施，有助市民應付難關！

       一年前呢個小專欄喺豬年新春開筆，我特別從幾個有趣嘅角度談豬，因而講到自家製肥燶瘦叉燒，又講到自家曬臘肉。開講有話「北風起，曬臘味」，不過現今市場供應嘅臘味，大部分都係用爐烘乾，少有天然生曬。如果屋企有地方適合嘅，不妨試下自家曬臘肉，得意，易做。

       盧家私房臘肉，以「本地黑毛豬腩肉」炮製。香港現時有豬場專門養黑毛豬，食味好，因而比一般豬種貴啲。喺大埔街市，就有專門賣本地黑毛豬嘅肉檔。同檔主講明曬臘肉，佢就會將豬腩肉切啱長條。以鹽、糖、生抽、老抽、玫瑰露酒，再加些少山西汾酒，醃一晚，日間就可以掛起曬之！當然啦，最緊要擇日子，意思唔係睇通勝，而係睇天氣預測，有一個星期連續天氣乾爽，有北風、有陽光，咁就最啱曬臘肉啦！

       其實如果唔識處理某種食材嘅話，最佳導師就係賣相關食材嘅店舖商販。邊買餸，邊收料，乃行街市樂趣之所在。我亦敦促政府做好規劃，滿足市民對傳統街市嘅需求，因為係超級市場難以替代㗎！