財政司司長陳茂波早前喺立法會公布新一份《財政預算案》，最多人討論，當然係全民派一萬元現金啦，但事實上其他「抗疫症、撐企業、保就業、惠民生」嘅措施，亦好值得關注。財爺今次決定推出大規模嘅逆周期措施，涉及超過一千二百億元。不過我亦認同喺香港面對來勢洶洶嘅疫情與逆境之際，非開倉賑災不可。本港累積萬多億元儲備，此時不用於抗疫救市，更待何時？

       經民聯就預算案與財爺幾次會面提意見，亦感到喺突如其來嘅肺炎疫症，呢個特區大掌櫃真係唔易做。由政府百分百擔保企業以特惠低息貸款、減免工商用戶水電費及豁免商業登記費、補助中小承建商及分包商、放寬科技券資助限制等等，財爺都算係從善如流。本港市道低迷，不少中小企已經奄奄一息，政府百分百擔保低息貸款，有助企業支付未來數月嘅租金及員工薪酬等支出，係向中小企拋出嘅一條「救命草」。

       雖然財爺大手筆「派糖」，但措施未能完全「止咳」。《預算案》支援中產嘅措施未足夠，政府仍然需要按經濟狀況嘅變化隨時加碼救市。唯有咁做，先可以協助市民與企業應付難關。同時，特區政府亦必須想方設法振興經濟，令各行各業重現生機，以免政府財政「坐食山崩」。

        今次《預算案》嘅利得稅、薪俸稅等嘅退稅金額只維持二萬元上限，令唔少中小企及中產人士感到失望。另外，市場逆轉，中小企資金周轉壓力甚大，社會上有唔少評論認為政府有必要研究樓市「減辣」，特別係放寬工商舖嘅「辣招」，以助中小企出售物業以獲取流動資金自救。

       總而言之，抗疫救市措施，「急如星火、刻不容緩」！