本文執筆前幾日，三月十一日下午，立法會財務委員會終於通過二百二十五億元嘅「基本工程儲備基金整體撥款」。現時政府工程嘅審批制度，一般涉及三千萬元以上嘅項目就要到立法會獨立走程序，即係先交由相關嘅事務委員會討論，再到工務小組，最後由財委會決定是否批款。少於三千萬元嘅，就匯總喺一筆「基本工程儲備基金整體撥款」內，先交工務小組，再到財委會審批。

       今次呢筆二百二十五億元嘅整體撥款，其實涵蓋一萬多項來自眾多政府部門嘅工務工程，有啲係在持續進行中嘅，需要喺四月一日前獲得新嘅資金去支付工程費用，亦有約一千五百多項新增工程。呢啲工程大部分都與民生相關，包括斜坡工程、渠務水務及市政設施等。撥款如未獲批核，相關工程工作就會斷纜，近兩萬名工人及專業人員亦都會被迫停工。

       在今年一月份，工務小組已經開咗兩次會審議是項整體撥款。我作為小組主席，本來想喺春節後加會，可惜因為新型冠狀病毒疫情而推遲。二月二十六日上午，喺財政司司長財政預算案宣讀之前，終於可以加會，議員戴住口罩開會審議，不過十分可惜，喺反對派議員拉布下，當日未能進行投票。由於撥款申請非常緊急，政府當局惟有直接交財務委員會審議。財委會到咗三月十一日已經係第三次加會審議該項目，但仍有反對派議員動議中止該議程嘅討論，一旦通過中止，相信有關撥款短期內難再交予財委會審議，所以有唔少工程業界朋友好緊張，一直收睇財委會嘅直播。最後撥款獲得投票通過，總算讓業界及眾多政府部門暫時鬆一口氣，相關工程從業員有工開！