近日多個與香港長期有緊密貿易關係嘅西方國家都受新冠肺炎嚴重衝擊，現時本港各行各業都處於水深火熱之中，政府必須盡快審時度勢，馬上動用財政儲備，推出第二輪防疫抗疫紓困措施，還富於民。

       立法會財委會喺二月廿一日通過嘅政府三百億元防疫抗疫基金中，有七億一千萬元喺用以支援承建商、分包商、工程顧問，及建造工人嘅。業界雖然歡迎，但亦反映話涵蓋面唔夠闊。發展局喺四月一日宣布，擴闊防疫抗疫基金對建造業嘅支援，惠及中小型工程顧問公司，及從事地盤以外嘅小工程，但係無拍咭紀錄嘅建造業工人。不過仍然有唔少中小企未能受助。我敦促政府喺第二輪抗疫舒困措施中，能夠補漏拾遺；最重要嘅，係既要撐企業，亦要保就業，實質支援僱員。我亦關注工程界新畢業同學及年輕工程師嘅生計，呼籲政府與業界力保呢啲生力軍嘅就業。

       發展局喺支持業界資金方面，已同意喺工務工程項目啟動時，給予承建商百分之二嘅特別支付金（不多於三千萬元），另給予工程顧問百分之五特別支付金（不多於五百萬元），稍解燃眉之急。

       由於疫情影響，工務工程喺「工作鏈、供應鏈、資金鏈，三鏈斷裂」嘅危機下，工期難免有所延遲。業界希望政府全面延後完工期限，並支援承建商因而招致嘅額外成本；亦期望其他半官方與公共事業機構嘅工程建設，以至私營建造項目，同樣給予業界相應嘅舒困措施，共渡時艱。

       工程界嘅工作與民生息息相關，喺疫情下都唔可以停擺；而且業界嘅持續生計，影響數十萬專業及基層員工。面對危機，政府必須「撐企業、保就業」！