新冠肺炎疫情與社會動亂重創本港經濟，各行各業都面對極大挑戰。我聯同工程業界代表，多番向政府建議及爭取業界「撐企業、保就業」嘅措施。政府回應積極，有多項能夠落實。至於點樣實質協助應屆工科畢業生嘅就業，政府亦正式接納咗建議！

       行政長官林鄭月娥喺面書專頁中表示：「我們在工程界立法會議員盧偉國的協調下，將職業訓練局和香港工程師學會合作為工程畢業生培訓計劃「A」提供資助的名額，由二百七十二個大幅增加至一千個，為年輕的準工程師提供入職機會，為香港未來的基建發展保留實力。」

       僱主按計劃提供認可培訓，可以向職業訓練局申領為期十八個月嘅每月五千六百一十元嘅薪金資助。喜見政府樂意與業界攜手，在逆境中繼續為畢業生提供入職培訓機會。呢個增加資助名額嘅消息一出，工程師學會、業界商會工會、職訓局、大學等持份者，都感到鼓舞。有商會並表示會鼓勵成員公司參加「A」計劃，吸納工科畢業生。

       至於今年完成培訓嘅實習生，能否獲得聘任為正式僱員，正式投身工程界？喺經濟逆周期之中，的確有隱憂。我呼籲政府，如企業願意聘用完成培訓嘅工程實習生，應該給予最少一年嘅薪金補助，發揮保就業嘅作用。

       工程業界一向都係比較多聯繫溝通嘅，因為工程項目根本就係靠團隊去推行。喺疫情中，業界作咗一首好動聽嘅抗疫歌曲《抗疫同舟》，仲係工程師作曲填詞，業界齊心唱和。我哋憑歌寄意，以歌聲呼籲同仁齊心抗疫，建設香港！能夠參與呢輯咁有意義嘅MV嘅錄音錄影，我感到非常榮幸。