全國人大決定授權常委會訂立「香港特區國家安全法」，並將有關法律列入基本法附件三，在港實施。消息一出，網絡平台上自然好多討論。唔少朋友都係結合當前香港與國內外形勢嚟分析，認為呢個決定既維護國家安全，又顧及目前香港自身難以完成有關立法嘅政治現實，係務實可行嘅做法。

       香港近幾年嘅社會情況已明確顯示，國家安全受到來自內部與外部勢力嘅實質威脅及嚴重損害。而香港回歸二十三年，仍未完成基本法二十三條立法。現在由中央依照憲法嚟行使權力，履行責任，以解決香港喺維護國家安全方面嘅問題，確保有關立法喺本港有效實施、執行到位，咁真正想香港繁榮安定、想一國兩制行穩致遠嘅朋友，理應支持。

       喺「黑暴」、「攬炒」與新冠肺炎疫情打擊之下，本港上季本地生產總值收縮百分之八點九，表現歷來最差，而失業率亦升至百分之五點二嘅十年新高。喺咁嚴峻嘅情況下，竟然有反對派政客主動要求美國對香港實施經濟制裁，對香港經濟民生、市民福祉落井下石，令人髮指！中央此時出手，係急香港所急。

       近日香港疫情稍為緩和，本來令市民睇到希望。可惜隨着疫情減退，「黑暴」「攬炒」行為捲土重來，街頭暴力開始增加，社會氣氛再趨緊張，令人既憤怒又擔心。特區政府為抗擊疫情已投入近三千億元，目的係幫助市民喺疫情下維持生計。如果暴力重臨，衝擊香港經濟，失業情況會更加惡化，後果係我地無法承受嘅！要搞活經濟，要吸引投資者，最基本條件係國家安全，社會安寧。希望香港止暴制亂，重回法治正軌，香港七百多萬市民安居樂業！