本文執筆之時，立法會財委會剛剛通過政府為挽救海洋公園而申請嘅五十四億元撥款，以償還債務，完成大樹灣工程，及暫夠資金營運一年。海洋公園自七七年開幕以來，不斷發展，現時佔地近九十二公頃，提供娛樂、教育與保育嘅體驗，累積接待一億四千萬人次。○三年開始自由行來港，令海洋公園人流上升，收入增加，經過一段輝煌嘅年代，亦因而銳意擴展，增加景點與設施。可惜近年本港政治風波，加上極端分子針對內地旅客嘅惡意挑釁，包括踢喼等行徑，令海洋公園人流大減。至於新冠病毒帶來嘅疫情，可以話係壓死駱駝嘅最後一根稻草，令人欷歔！

       海洋公園嘅海豚、海獅、殺人鯨、熊貓、金剛鸚鵡等，與水族館內各種千奇百怪嘅海洋生物，都係好多香港人成長中嘅難忘片段。而公園管理層近年亦力求突出保育元素，無論喺節能減碳、廚餘處理等方面，都落咗唔少工夫。

       海洋公園面臨倒閉，引起社會各界關注，有希望挽救嘅，亦有擔心要長期填氹，主張長痛不如短痛嘅，莫衷一是。其實萬一海洋公園倒閉，將有二千多名員工失業，而且要解決眾多海陸空生物嘅遷移，係極大嘅難題。我喺財委會發言時指出，我地唔應該視海洋公園為一門生意，而必須考慮其保育與教育嘅整體社會功能；再者如果呢個重要嘅旗艦都冇埋，對本港旅遊業影響非常負面。我建議公園撥出小部分土地，以增加優質嘅商舖，亦可以建屋出售以增加資金，例如年輕中產人士嘅首置單位就一定受歡迎。西九文化區何嘗唔係要靠將來嘅寫字樓、酒店、商舖增加收入，以維持文化藝術設施呢？多元發展，增加收入，方能以戰養戰。